لحظة صدق

امبارح كان امتحان مادة غلسة اوى...معرفش عملت ايه فى الامتحان...
ومعرفش الامتحان كان صعب ولا سهل اصلا...
وكل الى يسألنى بقول الحمد لله وبس..
الحمد لله ان اليوم عدى وخلاص.

رجعت من الامتحان اتغديت ودخلت نمت...قمت من النوم....وعلى ما شربت القهوة بتاعى وفوقت

وكان المفروض انى اقعد اذاكر عشان الامتحان الجاى...
المهم لقيت نفسي سايب المذاكرة وقعدت على الكمبيوتر

وقمت مشغل موسيقى كلاسيك بجد ملهاش حل

وانا بسمع الموسيقى افتكرت حاجات كتيير اوى

افتكرت ناس كتيير قابلتهم فى حياتى...منهم الى لسا فيها...ومنهم الى خرج منها..
بجد افتكرت حاجات كتيييير اوى...
استغربت جداا من الطرق الى بنبقى ماشيين فيها وفجأة تلاقينا فى طريق تانى خاااالص
استغربت من احلامنا الى بتتغير...
من نظرتنا للحياة الى بتختلف

ممكن الزحمة تاخدك من حاجة تحبها اوى كدا...
ممكن تبعدك عنها...ممكن تزعل ناس منك لانهم شايفينك مش مهتم...
مواقف كتير...احنا فعلا وقت ما الدنيا بتتزحم بنرتب اولوياتنا وبنكبر لحاجات كتير...
بنبعد عن ناس بنحبهم اوى...وبنبعد عن اماكن بنحبها...
وبنتخلى عن روتين حياتنا الى احنا مرتاحين معاه
...
بس كل دا مش عشان احنا بنحب الحاجة الى بنعملها دى..
انما لمجرد انها ظرف ولازم نتعامل معاه...


مش معنى انى بعدت عن هنا...يبقى انا مش بحب هنا......
ومش معنى انى بطلت اسأل او اتكلم يبقى الى هنا مش فى دماغى...
ومش معنى انى مشغول فى حاجة تانية انى بحبها اكتر من هنا...
انما معناها بس ان للاسف ساعات كتير بنضطر نعمل حاجات احنا مش حبينها..
وبنضطر نبعد عن حاجات كتير بنحبها اوى


واكتر من كدا كمان...
ساعات كتير اوى بنغلط فى حق ناس من غير ما نقصد...
وبنبعد عنهم من غير ما نقصد...
بس دا مش معناه اننا مش بنحترمهم ونحبهم...
يمكن معناه ان الحياة وظروفها ممكن تخلينا نعمل حاجات مش من طبعنا....
ومعناه كمان..اننا مش بنعفى نفسنا مسؤلية اننا بعدنا...
انما كنا نتنمى ظروف احسن من كدا ...
ظروف تساعدنا نكون كويسين